ඉදිරි මාස 4ට රටේ ආර්ථික කටයුතු සඳහා අවශ්‍ය මුදල් ලබාගැනීමට අගමැති මහින්ද රාජපක්ෂ මහතා ඉදිරිපත් කළ අතුරු සම්මත ගිණුමකට අද (21) රැස්වූ අමාත්‍ය මණ්ඩලයේ අනුමැතිය හිමි වී තිබේ.
එයඉදිරියේ පාර්ලිමේන්තුවට ඉදිරිපත් කිරීමට නියමිතය. සතියේ සුපුරුදු කැබිනට් සාකච්ඡාව ජනාධිපතිවරයාගේ ප්‍රධානත්වයෙන් ජනාධිපති කාර්යාලයේදී අද (21) පෙරවරුවේ පැවැත්වුණි.
කිසිදු ආකාරයක මූල්‍ය අර්බුදයකට ඉදිරියේදී රට මුහුණ නොදෙන බව මුදල් අමාත්‍යාංශයේ ලේකම්, මහා භාණ්ඩාගාර දෙපාර්තමේන්තුවේ ලේකම් ඇතුළු ආර්ථික විශේෂඥයෝ කිහිපදෙනෙක් කැබිනට් සාකච්ඡාවේදී කැබිනට් ඇමැතිවරු වෙත පෙන්වා දී තිබේ. විපක්ෂය මේ මොහොතේ රට ආර්ථික වශයෙන් කඩාවැටෙමින් පවතින බවට ගෙනයන ප්‍රචාර පිළිබඳව කැබිනට් සාකච්ඡාවේදී දීර්ඝ වශයෙන් සාකච්ඡා වී තිබේ. එළැඹෙන වසරේ ණය වාරික ගෙවා දැමීම කිසිදු ගැටලුවකින් තොරව කළ හැකි බවද මෙහිදී පෙන්වාදී තිබේ.
පැවැති රජයෙන් නීත්‍යනුකූලව ලබාගෙන ඇති ණය ප්‍රමාණයද ඉදිරියේදී රටේ ආර්ථිකයට උචිත පරිදි යොදා ගැනීමට හැකියාව ඇති බව මුදල් අමාත්‍යාංශයේ ලේකම්වරයා පෙන්වා දී තිබේ. කැබිනට් යෝජනා 43ක් කැබිනට් මණ්ඩලය වෙත කැබිනට් ඇමැතිවරු විසින් ඉදිරිපත් කර තිබේ. ඒ අතර කොළඹ නගරය ඇතුළු නාගරික ප්‍රදේශවල ගොඩගැසී ඇති කැළිකසළ බැහැර කිරීම සඳහා නව ක්‍රමවේද සැකසීම, නාගරික ප්‍රවාහන සේවා නවීකරණයට විදුලි බස් රථ මිලදී ගැනීම, නව පාලම් ඉදිකිරීම් ඇතුළු යෝජනා රැසක් ඉදිරිපත් වී තිබේ.
Lakbima online news
0 comments:
Post a Comment